अत्तरिया उद्योग वाणिज्य संघ थप विवादित बन्दै : दुवै पक्षले गरे छुट्टाछुट्टै भेला
अत्तरिया : कैलालीको अत्तरिया क्षेत्रका व्यवसायीहरूको संस्था अत्तरिया उद्योग वाणिज्य संघ दिन प्रतिदिन थप विवादमा फसेको छ । गत वर्ष आयोजना गरिएको महोत्सवको विवादपछि समितिका ११ जना पदाधिकारीले राजीनामा दिएपछि अहिले समिति थप विवादित भएकाे हो । यस वर्ष पनि महोत्सव लगाउने चर्चाका बिच समितिका दुई तिहाइ सदस्यले नै राजीनामा दिएको अवस्थामा कसरी अगाडि बढ्ने भन्ने विवाद कायम रहेकाे छ । यस बिचमा हाल संघको अध्यक्ष रहेका कल्याण सिंह बोहरा र राजीनामा दिएका ११ जनाले छुट्टाछुट्टै भेला वाेलाई छलफल थालेका छन् । दुवै पक्षले यस क्षेत्रका व्यवसायीलाई बोलाएर छलफल आयोजना गरेका भए पनि अझै कसरी अगाडि बढ्ने भन्ने बारेमा भने निष्कर्षमा पुग्न सकेका छैनन् ।
यसैबिच मंगलबार राजीनामा दिएको पक्षले अत्तरिया क्षेत्रका व्यवसायी र सल्लाकार समितिका पदाधिकारीको भेला बोलाएको थियो । भेलाले संघमा देखिएको समस्या समाधानका लागि ७ सदस्यीय समन्वय समिति गठन गरेकाे छ । समितिमा गोकर्ण भट्ट, सुरत कार्की, हरिकृष्ण पाण्डे, धना चोखाल, धर्म कुँवर, गणेश महरा र वीर बहादुर चोखाल रहेका छन् ।
यसअघि भेलालाई सम्बोधन गर्दै सहभागीहरूले अत्तरिया उद्योग वाणिज्य संग महोत्सव केन्द्रित हुनुभन्दा पहिले समिति भित्रको समस्या समाधान तर्फ लाग्नुपर्नेमा जोड दिएका थिए । संघका सल्लाहकार नर बहादुर मौनीले उद्योग वाणिज्य संघलाई निकास दिनका लागि अब इमान्दार, नैतिकवान् व्यक्ति समितिमा आउनु पर्ने विचार राखेका थिए । उनले तदर्थ समिति बनाएर वा अहिलेकै समितिलाई मिलाएर जाने विकल्पका बारेमा छलफल गरेर अगाडि बढ्नुपर्ने बताए ।
संघका सल्लाहकार हरिकृष्ण पाण्डेले अब अध्यक्षले नैतिकताको आधारमा राजीनामा दिएर विकल्प खुला गर्नुपर्ने बताए । व्यवसायी धर्मसिंह कुँवरले भने ११ जनाले सामूहिक राजीनामा दिएर पनि गल्ती गरेको बताए । उनले ११ जनाले राजीनामा दिएर गलत विरुद्ध लड्नु पर्ने त्यसाे नगरेकाेले व्यवसायीहरूलाई धोका दिएको गुनासो गरे ।
व्यवसायी तथा संघर्ष समिति संयाेजक गणेश बलायरले अध्यक्षले बहुमत गुमाइसकेपछि वैधानिकता खोज्नु गलत रहेको बताए । उनले समितिलाई व्यवसायीहरूले अस्वीकार गरिसकेको बताए । त्यस्तै संघका पूर्व अध्यक्ष कमल कडायतले पनि अहिले कुरा बाहिर आए पनि संस्थामा लामो समयदेखि बेथिति रहेको बताए ।
त्यस्तै भेलामा बोल्दै व्यवसायी धना देवी चोखालले संस्थाले व्यवसायीहरूको हितमा काम गर्न नसकेको बताइन् । उनले व्यवसायीको हकहितमा लाग्नुपर्ने संस्थाको कार्यसमिति आफैमा लडिरहेको बताइन् । त्यस्तै ईश्वरा आर्चायले अत्तरिया उद्योग वाणिज्य संघलाई यहाँसम्म ल्याउन आफूहरूले धेरै मिहिनेत गरेको बताउँदै अब यो समितिले काम गर्न नसक्ने बताइन् । व्यवसायी गोकर्ण भट्टले नयाँ कार्यसमिति चयन गरेर अगाडि बढ्नुपर्ने बताए । व्यवसायी राजेन्द्र खड्काले मिलेर जान सक्ने अवस्था भए मिल्नु उचित हुने बताए । व्यवसायी गणेश महराले ११ जनाले आफ्नो मर्जीले राजीनामा दिएर गलत गरेको बताए । राजीनामा दिने पक्षले बोलाएको भेलामा संघका अध्यक्ष तथा राजिनामा नदिने पक्ष भने उपस्थित थिएनन् ।
अत्तरियामा गत वर्ष पुस २६ गतेदेखि माघ ७ गते सम्म सञ्चालन गरिएको महोत्सव नक्कली टिकट ठेली भेटिएपछि विवाद उत्पन्न भएर अदालतमा मुद्दा नै परेको थियो । अदालतमा मिलापत्रबाट मुद्दा किनारा लागेको भए पनि अध्यक्षमाथि नैतिकताको प्रश्न उठाउँदै समितिका ११ जना पदाधिकारी र सदस्यले राजीनामा दिएका थिए । १५ जनाको समितिमा ११ जनाले राजीनामा दिएपछि आगामी दिनमा कसरी अगाडि बढ्ने भन्ने विवाद तथा अन्याैलता कायम रहेको छ । यसबिच अध्यक्षले महोत्सव लगाउने भन्दै छलफल अगाडि बढाएका छन् भने राजीनामा दिएको पक्षले अहिले समितिमा ४ जना मात्रै बाकी भएकाले तत्काल कुनै पनि गतिविधि गर्न सम्भव नभएको भन्दै विकल्प खोज्न माग गर्दै आएको छ। यस्ताे किसिमकाे लामाे समयदेखि रहेकाे उद्याेग वाणिज्यकाे कार्यसमितिकाे विवादले गर्दा यहाका व्यापारीहरु मार्कामा परेकाे अाम व्यावसायीहरुकाे भनाई रहेकाे छ ।
