नवजीवन सहकारी द्वारा खाद्य उद्योग सञ्चालन

शनिबार पत्रकार सम्मेलन गर्दै संस्थाले सञ्चालनमा ल्याएको खाद्य उद्योग प्रवद्धन तथा भावी योजनाका बारेमा जानकारी गराएको हो । पत्रकार सम्मेलनमा बोल्दै संस्थाका अध्यक्ष देव बहादुर बमले आव २०७५/७६ मा रिज्मको ३७ लाख र संस्थाको ६५ लाख गरी एक करोड २ लाखमा पाँच हजार क्विन्टल क्षमताको गोदामघर निर्माण गरिएको बताए । अध्यक्ष बमले हालसम्म किसानसँग १६ हजार २८ क्विन्टल धान खरिद गरेको तथा १ हजार एक सय ८४ क्विन्टल धान कुटाइ गरेको र ६ सय ५१ क्विन्टल २५ किलो चामल उत्पादन गरिएको बताए ।

फोहर,वालुवा,माटो अलग गर्ने मेसिन रहेकाले एकदमै सफा र स्वच्छ चामल पाइने उनले बताए । शेयर सदस्यसहित आम नागरिकले स्वच्छ र अर्गानिक चामल उपभोग गर्न पाउने उनले बताए । सहकारीले उत्पादित चामल बिक्रि वितरण समेत सुरु गरेको छ । कैलाली,कञ्चनपुर र बर्दियामा रहेका १० वटा सेवाकेन्द्रमार्फत उत्पादित चामल बिक्री गरिने उनले बताए । हाल मोटा चामल(ग्रेडिङ चामल) र मसिनाे चामल उत्पादन गर्दै आएको उनले बताए ।

सहकारीका शेयस सदस्यबाट उचित मूल्यमा धान खरिद गरि विशेष छुटमा शेयर सदस्यहरुलाई १० वटै सेवा केन्द्रबाट चामल बिक्री गर्ने भावी योजना रहेको उनले बताए । पीठो,तेल तथा डेरी उद्योग उत्पादन तथा बिक्री गर्ने,राइसमिल रहेको क्षेत्रलाई नवजीवन औद्योगिक ग्रामका रुपमा विकास गर्दै लैजाने,व्यवस्थित गोदाम तथा भौतिक संरचना विकास गर्दै लैजाने तथा शेयर सदस्यलाई प्रत्यक्ष र अप्रत्यक्षरुपमा उत्पादनसँग जोडेर आर्थिक विकासमा टेवा पु¥याउने संस्थाको उदेश्य रहेको उनले बताए ।