डडेल्धुरा अस्पतालका अध्यक्ष सिंहले स्नातक नगरेको पाटन क्याम्पसद्धारा पुष्टि, पदवाट राजीनामा दिँदै अध्यक्ष सिंह
डडेल्धुरा । पाटन सयुक्त क्याम्पसले डडेल्धुरा अस्पताल विकास समितिका अध्यक्ष लक्ष्मण सिंहले स्नातक नगरेको पुष्टि गरेको छ । स्वास्थ्य तथा जनसंख्या मन्त्रालयलाई प्रमाणपत्र सच्याउन पठाउँदै सिंहले स्नातक नगरेको उल्लेख गरेको हो ।
केही दिनअघि अस्पतालमा आयोजित कार्यक्रममा भने अध्यक्ष सिंहले आफ्नो शैक्षिक प्रमाणपत्र नक्कली नभएको मिडियालाई वताएका थिए । `मेरो शैक्षिक प्रमाणपत्रबारे प्रश्न उठाइदैछ,´ उनले भनेका थिए, `मेरो बुवादेखि छोरासम्मले डिग्री गरिसके । मेरो योग्यता नक्कली हुने कुरै छैन ।´यस्तै अध्यक्ष सिंहले पदबाट राजीनामा दिने भएका छन् । सर्वोच्च अदालतले नियुक्ति खारेजको निर्णय कार्यान्वयन नगर्न अन्तरिम आदेश दिएपछि डडेल्धुरा अस्पताल विकास समितिका अध्यक्ष सिंह केहीदिनअघि कामकाजका लागि अस्पतालमा उपस्थित भएका थिए ।
तर सिंहले भने अस्पताल प्रशासनमा काम गर्ने वातावरण नहुनु, मेसु चेतराज भट्टको कार्यशैलीले तनाव दिएको तथा अस्पतालका पूर्व अध्यक्ष करुणाकर ओझाले आफ्नो चरित्र हत्या गर्ने विभिन्न षड्यन्त्र रच्नुबाट आजित भएर राजीनामा गर्न लागेको बताएका छन् । वैशाख १७ गतको प्रधानमन्त्रीस्तरीय निर्णयले सिंहलाई अस्पताल विकास समितिको अध्यक्षमा नियुक्त गरिएको थियो । तर उनले पदभार ग्रहण गरेकै दिन मन्त्रीस्तरीय निर्णयबाट उनको नियुक्ति खारेज भएको थियो भने अस्पताल विकास समितिको अध्यक्षमा करुणाकर ओझा नियुक्त भएका थिए ।
तर, सर्वोच्च अदालतले जेठ ९ गतेमा सिंहको नियुक्ति खारेज नगर्न र तत्कालका लागि सिंहलाई नै अध्यक्षका रुपमा काम गर्न दिन अन्तरिम आदेश दिएको थियो ।
