राप्रपामा नेतृत्व परिवर्तन पदाधिकारीमै अल्पमतमा परेका छन लिङ्देन


राष्ट्रिय प्रजातन्त्र पार्टीको अध्यक्ष पदमा कमल थापाजस्तो हस्तीलाई हराउँदै राजेन्द्र लिङ्देन विजयी बनेका छन् । तर, पदाधिकारीमै अध्यक्ष लिङ्देन अल्पमतमा परेका छन् । केन्द्रीय समितिमा पनि कमल थापा पक्षको बलियो उपस्थिति देखिएको छ । राजेन्द्र लिङ्देनलाई अध्यक्षमा हराउन राप्रपाका हस्तीहरू कमल थापा, पशुपति शमशेर जबरा, दीपक बोहरा, बुद्धिमान तामाङ, ध्रुवबहादुर प्रधान र जयन्त चन्दसमेत एकजुट भएर लागेका थिए । तर, लिङ्देनले सबैको घेरा तोड्दै जित हात पारे । तर, पार्टीभित्रको समीकरण हेर्दा अध्यक्ष लिङ्देनलाई अघि बढ्न भने त्यति सजिलो छैन । प्राप्त मतगणनाको अन्तिम परिणामअनुसार लिङ्देनले अध्यक्षमा जिते पनि पदाधिकारीमा कमल थापा पक्ष हाबी भएको छ । केन्द्रीय कमिटीमा पनि कमल थापाको बलियो उपस्थिति देखिएको छ ।
राप्रपाको १९९ सदस्यीय केन्द्रीय कमिटीमा महाधिवेशनले पदाधिकारीसहित १४९ जनालाई निर्वाचित गरेको छ । यसमध्ये कमल थापा पक्षको बलियो उपस्थिति छ । तर, अध्यक्ष लिङ्देनले विधानअनुसार अब ५० जनालाई केन्द्रीय कमिटीमा मनोनीत गर्न पाउने छन् । अब मनोनीत गर्ने कार्य पूरा भएपछि केन्द्रीय समितिमा लिङ्देन सुविधाजनक बहुमतमा पुग्ने उनी पक्षधर नेताहरू बताउँछन् ।
राप्रपाको उपाध्यक्षमा महिलासहित ४ जना निर्वाचित हुने विधानमा व्यवस्था छ । त्यस्तै, महामन्त्रीमा महिलासहित ३ जना निर्वाचित हुने व्यवस्था विधानमा छ । बाँकी पदाधिकारी पछि मनोनयन गरिनेछ ।
अध्यक्षसहित पदाधिकारीको ८ पदमा भएको निर्वाचनमा राजेन्द्र लिङ्देन पक्षबाट महामन्त्रीमा धवल शमशेर राणामात्रै विजयी भएका छन् । दुवै पक्षले आफ्नो प्यानलमा खुलेका विक्रम पाण्डे कता खुल्छन् भन्ने टुङ्गो लागिसकेको छैन । पाण्डे लिङ्देनकै पक्षमा लागे भने पनि पदाधिकारीमा कलम थापा पक्षको बहुमत पुग्छ ।
पदाधिकारीमा थापा पक्षबाट उपाध्यक्षमा ध्रुवबहादुर प्रधान र बुद्धिमान तामाङले जितेका छन् । महिला उपाध्यक्षमा कमल थापा समूहकै रोशन कार्की विजयी भएका छन् । उपाध्यक्षमा लिङ्देन पक्षका दिलविकास राजभण्डारी, रामचन्द्र राय र दुर्गा श्रेष्ठ तीनैजना पराजित भए ।
महामन्त्रीमा महिलातर्फ लिङ्देन पक्षकी अभिनेत्री रेखा पराजित भइन् । उनी महिला कोटामा महामन्त्रीको उम्मेदवार थिइन् । उनलाई हराउँदै थापा पक्षकी कुन्ती शाही महामन्त्रीमा विजयी भइन् भने खुल्लातर्फका दुई महामन्त्रीमध्ये थापा पक्षका भुवन पाठक र लिङ्देन पक्षका धवलशमशेर राणाले जिते । महामन्त्रीमा लिङ्देन पक्षका श्याम तिमल्सिना पनि पराजित बने भने कमल थापा पक्षका भास्कर पनि पराजित भए ।
महामन्त्रीमा विजयी भएपछि प्रतिक्रिया दिँदै धवलशमशेर राणाले सबै पक्षलाई मिलाएर पार्टीलाई उचाइमा पुर्‍याइने बताए । उनले पार्टी बाहिर रहेका हिन्दुवादी र राजावादी धारलाई समेट्न पहल गरिने भन्दै त्यसका लागि वर्तमान नेतृत्व लागिपर्ने बताए । ‘कार्यकर्ताहरूले जुन खालको जिम्मेवारी दिनुभएको छ, त्यसलाई वर्तमान नेतृत्वले पूर्णरुपमा पालना गर्छ’, राणाले भने, ‘हामी सबै नेतृत्व वर्गलाई पनि समेटेर उहाँहरुको बुद्धि विवेक र अनुभवलाई पार्टी र जनताको हितमा काम गछौँ ।’

यो खबर पढेर तपाईलाई कस्तो महसुस भयो ?
+1
0
+1
0
+1
0
+1
0
+1
0
+1
0