कर्णाली नदीमा बेपत्ता कैलालीका ३ जनाको सकुशल उद्दार

अत्तरिया– कर्णाली नदीमा माछा मार्न गएका कैलालीका ३ जनाको सकुशल उद्दार गरिएको छ । कैलाली जानकी गाउँपालिका–९ र बर्दिया जिल्लाको बीचमा पर्ने कर्णाली नदीको लालमटिया टापुबाट तिनै जनाको सकुशल उद्दार भएको जिल्ला प्रहरी कार्यालय कैलालीले जनाएको छ। उनीहरुको अवस्था सामान्य रहेको जिल्ला प्रहरी कार्यालय कैलालीका प्रहरी नायव उपरीक्षक प्रतीक विष्टले बताए।

२ दिनअघि सोमबार माछा मार्न भन्दै गएका लम्कीचुहा नगरपालिका वडा नम्बर ३ का ६१ वर्षीय खडक बहादुर घर्तिमगर, सोही ठाउँका ३५ वर्षीय बिक्रम घर्तिमगर र २६ वर्षीय खडक रानामगर बेपत्ता भएका थिए। उनीहरुको खोजी कार्यको लागि स्थानीय १० जनाको टोली खटिएको थियो।